ऋषि सुदामा

गएछन जानेहरुले अवस्था नाजुक छोडेर गएछन 

जान्न भन्नेहरुले पनि त मुलुक छोडेर गएछन 

खालै बाट स्वाहा पारे महारथीहरुले यो देश 

कुन प्रभुले कुन समयमा कस्तो सुख छोडेर गएछन 

मध्य रातमा बास माग्न आएका थिए पुजारी 

जाँदा घरको ढोकामा बन्दुक छोडेर गएछन 

            ***

कुनै बेला एउटै मुटु बन्नेहरु कहाँ होलान 

तँ बिना त बाँच्दैन म भन्नेहरु कहाँ होलान 

आज गोलार्धमा एक्लै एक्लै बसी सोच्दै छु म 

सँगै बसी हातका औंला गन्नेहरु कहाँ होलान 

को को भए होलान यात्री, को पुगे हो गन्तब्यमा 

पहिलो पटक प्रेम पथ खन्नेहरु कहाँ होलान  

~ ऋषि सुदामा ~

Rishi Sudama